سب سے زیادہ ہلاکتیں اہل تشیع کے مذہبی تہوار میں ہوئیں

عراق میں پولیس حکام کے مطابق چھے صوبوں میں بم دھماکوں کے دس مختلف واقعات میں کم از کم باسٹھ افراد ہلاک اور درجنوں زخمی ہو گئے ہیں۔ حکام کے مطابق دارالحکومت بغداد میں اہل تشیع کے ایک مذہبی تہوار پر بم حملے میں سب سے زیادہ ہلاکتیں ہوئیں ہیں۔

اس کے علاوہ صوبہ حلہ میں ایک ریستوران کے قریب ہونے والے دو بم دھماکوں میں سترہ افراد ہلاک ہو گئے۔

خیال رہے کہ ایک ایسے وقت جب اہل تشیع امام موسیٰ کاظم کا یوم وفات منا رہے ہیں، عراق میں شیعہ برادری پر حملوں میں غیر ممعولی اضافہ ہوا ہے۔ اتوار کو بغداد میں ہی ایک مذہبی مقام کے نزدیک مارٹر گولوں کے حملوں میں چار افراد ہلاک ہو گئے تھے۔

عراق کی وزارتِ داخلہ کا کہنا ہے کہ پرتشدد واقعات کے بعد سکیورٹی انتظامات میں اضافہ کر دیا گیا ہے تاکہ مزید کوئی ناخوشگوار واقعہ پیش نہ آئے۔ عراق میں گزشتہ چند سال کے دوران فرقہ وارانہ تشدد کے واقعات میں کمی آئی ہے تاہم اب بھی شدت پسند اکثر اوقات سکیورٹی فورسز اور عام شہریوں کو نشانہ بناتے رہتے ہیں۔

عراق میں بم دھماکوں کے واقعات میں اس وقت سے اضافہ دیکھنے میں آیا ہے جب شیعہ مسلک کے وزیر اعظم نے سنی مسلک کے سیاسی گروپ عراقیہ پولیٹکل بلاک کے ایک اہم سیاسی رہنما اور نائب صدر کے خلاف اقدامات کا اعلان کیا تھا۔

اخبار -